Экскурсія ў г.Мінск
Заканчэнне навучальнага года – час не толькі адказны, але і прыемны. Напярэдадні летніх канікулаў, 28 мая, вучні 5А, 5В, 5Г і 7А класаў наведалі г.Мінск.
Вялікае ўражанне ў вучняў выклікаў музей гісторыі Вялікай Айчыннай вайны – першы ў свеце, прысвечаны самай крывапралітнай вайне ХХ стагоддзя. Ваенная зброя, сапраўдная баявая тэхніка, унікальныя асабістыя рэчы франтавікоў, макеты сцэн ваенных дзеянняў – усё гэта прымусіла школьнікаў задумацца пра подзвіг і ахвяры савецкага народа ў час вайны.
Вельмі спадабалася вучням экскурсія ў Дзяржаўны літаратурны музей Я.Купалы, 140-годдзе з дня нараджэння якога мы адзначаем у гэтым годзе. Янка Купала і Якуб Колас, славутыя сыны зямлі беларускай, пакінулі незабыўны след у гісторыі нацыянальнай літаратуры, таму сёння ў школьнай праграме так шырока вывучаецца творчасць гэтых славутых песняроў.
А завяршылася экскурсія наведваннем Батанічнага саду. Дзеці з задавальненнем гулялі па алеях, любаваліся рададэндронамі, магноліямі і цюльпанамі. А экскурсавод вяла цікавы аповед пра багаты свет беларускай флоры.
Экскурсіі па Бацькаўшчыне дапамагаюць настаўнікам у выхаванні патрыятызму, грамадзянскасці і нацыянальнай самасвядомасці вучняў.